Dros y 50 mlynedd ddiwethaf, mae gweithgareddau dynol – yn enwedig llosgi tanwydd ffosil – wedi rhyddhau digon o garbon deuocsid a nwyon tŷ gwydr eraill i ddal gwres ychwanegol yn yr atmosffer is ac effeithio ar yr hinsawdd fyd-eang. Yn ystod y 130 mlynedd ddiwethaf, mae’r byd wedi cynhesu tua 0.85oC. Mae pob un o’r 3 degawd diwethaf wedi bod yn gynhesach nag unrhyw ddegawd blaenorol ers 1850.

Gellir ond amcangyfrif yr effeithiau iechyd yn sgîl y newid yn yr hinsawdd.  Fodd bynnag, daeth asesiad gan Sefydliad Iechyd y Byd, yn ystyried is-set yn unig o’r effeithiau posibl ar iechyd, ac yn rhagdybio twf economaidd parhaus a chynnydd iechyd, i’r casgliad y disgwylir i’r newid yn yr hinsawdd achosi tua 250,000 o farwolaethau ychwanegol y flwyddyn rhwng 2030 a 2050; 38 000 yn sgîl cyswllt â gwres ymysg pobl oedrannus, 48 000 oherwydd dolur rhydd, 60,000 oherwydd malaria, a 95 000 yn sgîl diffyg maeth yn ystod plentyndod (Sefydliad Iechyd y Byd, 2021).

Mae Amcanestyniadau o Newid yn Hinsawdd y DU yn rhoi trosolwg o’r newid yn yr hinsawdd yn y DU.  Yng Nghymru, gallwn ddisgwyl mwy o law, llifogydd mewn ardaloedd arfordirol isel yn ogystal â hafau sychach, poethach.  Mae’r amcanestyniadau hefyd yn rhagweld cynnydd mewn diwrnodau cynnes iawn, gaeafau mwynach a gwlypach, llai o eira a rhew yn ogystal â lefelau dŵr daear is. (Cyfoeth Naturiol Cymru, 2021)