Mae’r nwyddau a’r gwasanaethau y mae’r amgylchedd yn eu darparu ar ein cyfer – aer, bwyd, lloches a dŵr, yn hanfodol ar gyfer iechyd a lles dynol.  Yn ogystal, mae cyswllt ag amgylcheddau naturiol, a defnydd ohonynt, fel coetir neu’r môr, hefyd yn cael effaith uniongyrchol ar iechyd dynol.  Mae amgylcheddau naturiol yn gydrannau pwysig o ‘fannau iach’ a gallant hyrwyddo a chynnal iechyd a chynorthwyo adferiad yn dilyn salwch.  Ceir tystiolaeth bod cyswllt ag amgylcheddau gwyrdd yn gwella iechyd meddwl, yn lleihau marwolaethau ac yn gysylltiedig â lefelau is o ordewdra a chanlyniadau iechyd gwell i famau a phlant (DEFRA, 2018)

Gall ymgysylltu ag amgylcheddau naturiol a’u diogelu, trwy hamdden gweithredol a goddefol, hefyd wella tegwch cymdeithasol a chydlyniant pobl a chymunedau, cynyddu gwerthfawrogiad pobl o’r amgylchedd a’u gofal amdano, a chynyddu buddion economaidd hamdden.  Pan mae gofod gwyrdd a glas yn cael eu hintegreiddio’n llawn â’r amgylchedd adeiledig, gall hyn helpu i leihau effeithiau newid yn yr hinsawdd, llifogydd a llygredd aer (Cyfoeth Naturiol Cymru, 2021).