Mae llesiant ariannol yn chwarae rhan hanfodol wrth lunio iechyd a llesiant. Mae Iechyd Cyhoeddus Cymru wedi nodi Llesiant Ariannol fel un o’i bum blaenoriaeth polisi allweddol ar gyfer Llywodraeth nesaf Cymru.

Bydd y weminar hon yn dwyn ynghyd arbenigedd cenedlaethol i archwilio’r cysylltiadau rhwng amgylchiadau ariannol a chanlyniadau iechyd yng Nghymru.

Mae Iechyd Cyhoeddus Cymru wedi gweithio mewn cydweithrediad ag aelodau o Grŵp Llywio Cynllun Cyflawni Llesiant Ariannol Cymru, gan gynnwys y Gwasanaeth Arian a Phensiynau a Llywodraeth Cymru, i amlinellu’r cysylltiadau rhwng amgylchiadau ariannol a chanlyniadau iechyd yng Nghymru. Bydd Lee Phillips o’r Gwasanaeth Arian a Phensiynau yn rhannu mewnwelediadau o’r sesiwn friffio, ‘Llesiant ariannol fel bloc adeiladu ar gyfer iechyd‘, ac yn rhoi’r wybodaeth ddiweddaraf i’r cynrychiolwyr ar y gwaith parhaus i gysylltu llesiant ariannol yn well â gwella iechyd yng Nghymru.  Bydd y sesiwn yn tynnu sylw at ba grwpiau poblogaeth sy’n cael eu heffeithio fwyaf a sut y gall mabwysiadu dull iechyd y cyhoedd o ymdrin â llesiant ariannol arwain at ganlyniadau iechyd ac ariannol gwell yn y tymor hir.

Bydd y weminar hefyd yn cynnwys canfyddiadau o’r cynllun peilot Incwm Sylfaenol i Bobl sy’n Gadael Gofal, a werthuswyd gan y Ganolfan Ymchwil a Datblygu Gofal Cymdeithasol Plant (CASCADE). Bydd Vibhor Mathur o CASCADE yn cyflwyno canfyddiadau allweddol y gwerthusiad hyd yma, ac yn rhannu’r hyn y mae pobl ifanc wedi’i ddweud wrthym am sut mae’r incwm sylfaenol wedi effeithio ar eu bywydau, eu llesiant a’u prosesau gwneud penderfyniadau ariannol.