Mae wedi cael ei brofi bod Gweithgarwch Corfforol yn helpu i atal a rheoli ystod o glefydau anhrosglwyddadwy fel clefyd y galon, strôc, diabetes a sawl math o ganser.  Mae hefyd yn helpu i atal pwysedd gwaed uchel, cynnal pwysau corfforol iach a gall wella iechyd meddwl, llesiant ac ansawdd bywyd (WHO, 2021).

Ym mis Medi 2019, cyhoeddodd pedwar Prif Swyddog Meddygol y DU, sef Cymru, Lloegr, yr Alban a Gogledd Iwerddon, adroddiad sydd yn diweddaru canllawiau Gweithgarwch Corfforol 2011.  Mae Prif Swyddogion Meddygol y DU yn defnyddio tystiolaeth fyd-eang i gyflwyno canllawiau ar gyfer grwpiau oedran gwahanol, yn cynnwys cyfaint, hyd, amlder a’r math o weithgaredd corfforol sydd yn ofynnol ar draws cwrs bywyd i gael buddion iechyd. (Canllawiau Gweithgarwch Corfforol y Prif Swyddogion Meddygol, 2019).  Yng Nghymru yn 2019/20, cyflawnodd 53% o’r boblogaeth sydd yn oedolion y 150 o funudau neu fwy o weithgaredd corfforol cymedrol a argymhellir yr wythnos, gydag un mewn tri o oedolion yn gwneud llai na 30 munud o weithgaredd corfforol cymedrol yr wythnos (Arolwg Cenedlaethol Cymru, 2020).