Mae gwaith teg, da o fudd i bawb gan fod tystiolaeth yn awgrymu bod ansawdd swydd yn effeithio ar ganlyniadau iechyd meddwl a chorfforol.  Mae swyddi teg, da a diogel yn gwella iechyd a llesiant a gall ansicrwydd ac anfodlonrwydd mewn swydd achosi gorbryder ac arwain at berfformio’n wael yn y swydd.  Am fod swyddi anfoddhaol neu ansicr yn gallu bod yr un mor niweidiol â diweithdra, ni fydd bod mewn swydd yn unig bob amser yn diogelu iechyd corfforol a meddyliol gweithwyr: mae ansawdd swydd yn bwysig hefyd.

Mae pandemig COVID-19 wedi gwaethygu anghydraddoldebau cymdeithasol, economaidd ac iechyd ac mae cyflogaeth deg a da yn hanfodol i fynd i’r afael â’r anghydraddoldebau hyn.  Mae’r pandemig wedi cael effaith sylweddol ar ansawdd swyddi mewn perthynas â thâl, math a thelerau cyflogaeth yn ogystal ag iechyd, llesiant a diogelwch gweithwyr.  Mae angen i adferiad ganolbwyntio nid yn unig ar nifer y cyfleoedd am gyflogaeth ond hefyd creu swyddi o ansawdd da ac ailhyfforddi gweithwyr a allai fod wedi colli eu swyddi.  Yn yr hirdymor bydd hyn yn sicrhau gweithwyr hapus ac iach.  Bydd goblygiadau i’r camau y bydd y Llywodraeth a chyflogwyr yn eu cymryd nawr am flynyddoedd i ddod a byddant yn pennu canlyniadau iechyd ac economaidd hirdymor.

Mae hwn yn gyfnod unigryw a digynsail ac mae Ailadeiladu yn Decach: Adolygiad COVID-19 Marmot (2020) wedi annog y Llywodraeth a gwneuthurwyr polisïau i ganolbwyntio ar ‘ailadeiladu yn decach’ nid yn well yn unig.  Rhan bwysig o ailadeiladu yn well ac yn decach mewn byd ar ôl COVID-19 yw sicrhau gwaith teg, da i bawb am y bydd hyn yn helpu i leihau anghydraddoldebau ac yn cynyddu iechyd a llesiant y boblogaeth.