Mae iechyd dynol a’n cynhyrchiant yn dibynnu ar gynnyrch a gwasanaethau ecosystem (fel argaeledd dŵr croyw, ffynonellau bwyd a thanwydd). Gall colli bioamrywiaeth gael effaith uniongyrchol sylweddol ar fodau dynol os nad yw gwasanaethau ecosystem yn ddigonol i fodloni anghenion cymdeithasol bellach. Yn anuniongyrchol, mae newidiadau i wasanaethau ecosystem yn effeithio ar fywoliaeth, incwm, mudo lleol ac, ar adegau, gall hyd yn oed achosi neu waethygu gwrthdaro gwleidyddol. Mae pryder cynyddol am ganlyniadau iechyd colli bioamrywiaeth ac effaith hyn ar anghydraddoldebau iechyd. Mae colli bioamrywiaeth hefyd yn golygu ein bod yn colli llawer o gemegau a genynnau natur, cyn eu darganfod – llawer ohonynt eisoes wedi rhoi buddion iechyd sylweddol i fodau dynol (Sefydliad Iechyd y Byd, 2021).

Mae gan Gymru gyfoeth o fywyd gwyllt ac amgylcheddau naturiol sydd yn cynnal ein hiechyd a’n lles. Mae gan bawb rôl i’w chwarae i ddiogelu ein bioamrywiaeth trwy weithgareddau a wneir ar lefel sefydliadol, cymunedol ac unigol. Mae Partneriaeth Bioamrywiaeth Cymru yn hyrwyddo ac yn monitro bioamrywiaeth ac mae eu gwefan yn cynnwys gwybodaeth am weithredoedd ac amcanion cenedlaethol a lleol a newyddion a digwyddiadau’n ymwneud â bioamrywiaeth.