Mae tystiolaeth gynyddol y gall y celfyddydau gefnogi iechyd a lles mewn nifer o ffyrdd yn cynnwys cynorthwyo ein hadferiad ar ôl salwch, lleihau ynysu, gwella iechyd meddwl a’n helpu i reoli cyflyrau hirdymor (Grŵp Seneddol Hollbleidiol ar y Celfyddydau, Iechyd a Llesiant, 2017).  Am y rhesymau hyn mae’r celfyddydau hefyd wedi cael eu hyrwyddo fel dull o leihau effeithiau cadw pellter cymdeithasol a lleihau anghydraddoldebau iechyd.

Yn 2020, adnewyddodd Cyngor Celfyddydau Cymru a Chonffederasiwn GIG Cymru Femorandwm Cyd-ddealltwriaeth i sefydlu’r celfyddydau yn y GIG a thrawsnewid gwasanaethau.  Yn y sector iechyd a gofal cymdeithasol yng Nghymru mae nifer o fentrau’r celfyddydau ac iechyd:

• Y celfyddydau yn yr amgylchedd gofal iechyd: mae hyn yn golygu cynnwys y celfyddydau yn amgylchedd ffisegol lleoliadau gofal iechyd fel lluniau, gerddi iachaol a mynediad at olau naturiol
• Cymryd rhan mewn rhaglenni celfyddydol: gweithgareddau celfyddydol unigol neu grŵp yw’r rhain mewn lleoliadau cymunedol a lleoliadau iechyd a gofal cymdeithasol â’r nod o wella a chynnal iechyd a lles
• Y celfyddydau ar bresgripsiwn: mae hyn yn rhan o bresgripsiynu cymdeithasol ac mae’n cynnwys pobl yn profi materion iechyd meddwl neu gorfforol yn cael eu hatgyfeirio (neu’n atgyfeirio eu hunain) i ymgysylltu â’r celfyddydau mewn lleoliadau cymunedol fel amgueddfeydd neu lyfrgelloedd.
• Cydlynwyr y celfyddydau: Mae hyn yn cyfeirio at ystod o weithgareddau’r celfyddydau yn cynnwys drama, cerddoriaeth a’r celfyddydau gweledol yn cael eu cynnig gan ymarferwyr sydd yn gweithio mewn lleoliadau clinigol.
• Hyfforddiant meddygol a’r dyniaethau meddygol: mae hyn yn cyfeirio at gynnwys y celfyddydau a datblygiad cychwynnol a pharhaus gweithwyr iechyd a gofal cymdeithasol proffesiynol.

Ar gyfer ymarferwyr sydd yn gweithio yn y celfyddydau ac iechyd, sefydlwyd Rhwydwaith y Celfyddydau, Iechyd a Llesiant Cymru yn 2013 i rannu ymarfer a chysylltu â’i gilydd.