Gall gofalu gael effaith sylweddol ar iechyd meddwl a chorfforol.  Canfu arolwg o ofalwyr yng Nghymru a gynhaliwyd yn 2017, ymysg y rheiny sydd yn darparu dros 50 awr o ofal yr wythnos, bod 59% yn teimlo bod eu hiechyd corfforol wedi gwaethygu o ganlyniad i ofalu, tra bod 70% wedi dweud eu bod wedi profi salwch meddwl (Gofalwyr Cymru, 2017).

Mae seibiau yn hanfodol i ofalwyr er mwyn osgoi diffygio ac i allu ymdopi â gofynion emosiynol a chorfforol darparu gofal a chymorth.  Mae seibiau a chymorth proffesiynol a chymorth cymheiriaid yn galluogi gofalwyr i barhau â’u rolau gofalu.  Yng Nghymru, mae’r Ddeddf Gwasanaethau Cymdeithasol a Llesiant (2014) a ddaeth i rym yn 2016, yn rhoi nifer o hawliau i ofalwyr ac yn rhoi dyletswyddau ychwanegol ar awdurdodau lleol yn cynnwys bodloni anghenion cymwys gofalwr yn dilyn asesiad o anghenion gofalwr, rhoi cyngor, gwybodaeth a chymorth a darparu ystod ehangach o wasanaethau a gweithgareddau cymunedol perthnasol y gellir cyfeirio gofalwyr atynt.