Mae sylfeini hanfodol iechyd oedolion yn cael eu sefydlu yn ystod bywyd cynenedigol a phlentyndod cynnar. Mae anghydraddoldebau plentyndod o ran iechyd corfforol, meddyliol ac emosiynol yn agos gysylltiedig â chynnydd mewn risg oes o iechyd corfforol a meddyliol gwael fel oedolion.

O ran atal salwch a/neu anfantais cymdeithasol yn yr hirdymor, ni ellir amcangyfrif yn rhy isel pwysigrwydd hybu a diogelu iechyd a llesiant plant a phobl ifanc.

Yng Nghymru, mae Llywodraeth Cymru wedi ymrwymo’n llawn i Gonfensiwn y Cenhedloedd Unedig ar Hawliau’r Plentyn (UNCRC), ac mae wedi creu saith nod craidd ar gyfer plant a phobl ifanc yng Nghymru. Mae’r nodau craidd yn disgrifio hawl plant a phobl ifanc i gael mynediad at wasanaethau addysg ac iechyd, a mynd i’r afael â’u hawl i gael eu clywed ac i gymryd rhan yn y penderfyniadau sy’n effeithio arnynt; mae hyn yn cynnwys cael y wybodaeth angenrheidiol i wneud dewisiadau. Dylai’r nodau craidd gael eu hystyried a’u gweithredu wrth greu neu gynnal gwasanaethau iechyd wedi eu hanelu at blant a phobl ifanc.
Plant yng Nghymru yw’r corff aelodaeth mantell cenedlaethol ar gyfer sefydliadau ac unigolion sydd yn gweithio gyda phlant, pobl ifanc a’u teuluoedd yng Nghymru. Mae’r sefydliad yn cyfrannu at weithredu UNCRC, yn eirioli gwasanaethau cynaliadwy, yn sicrhau bod sylw’n canolbwyntio ar y rheiny sydd â’r angen mwyaf ac sydd ar y cyrion ac yn sicrhau bod gan blant a phobl ifanc lais. Mae’r sefydliad yn bodloni’r nodau hyn trwy gyflwyno nifer o weithgareddau yn cynnwys: hyfforddiant, datblygu rhwydweithiau, lledaenu gwybodaeth a gwneud ymchwil.