Mae Sefydliad Iechyd y Byd, 2021 yn amcangyfrif bod tua 829 000 o bobl yn marw bob blwyddyn o ddolur rhydd o ganlyniad i ddŵr yfed anniogel, glanweithdra a hylendid dwylo.  Mae ansawdd dŵr, p’un ai’n cael ei ddefnyddio at ddibenion yfed, amaethyddiaeth neu hamdden, yn arwyddocaol i iechyd ym mhob poblogaeth.

Yng Nghymru, mae cwmnïau dŵr yn cyflenwi dŵr yfed sydd yn ddiogel ac yn cyrraedd y safonau ansawdd dŵr perthnasol.  Mae dŵr nad yw’n cael ei gyflenwi gan gwmnïau dŵr – cyflenwad ‘preifat’ – hefyd yn cael ei fonitro a’i asesu yn erbyn safonau dŵr yfed er mwyn sicrhau ei ansawdd.  Mae gan tua 80,000 o bobl yng Nghymru gyflenwad dŵr preifat (Iechyd Cyhoeddus Cymru, 2021).  Weithiau, gall lefelau uwch o gemegau niweidiol fod yn bresennol mewn dŵr, o ffynonellau naturiol, amaethyddiaeth neu weithgareddau diwydiannol, neu wrth gael eu rhyddhau’n ddamweiniol.  Mae gan ddŵr yfed sydd wedi cael ei halogi y potensial i arwain at salwch yn y tymor byr a’r hirdymor.  Gall dŵr yfed hefyd fod yn gyfrifol am ledaenu clefydau heintus os caiff ei halogi’n fiolegol.