Yn ddiweddar, cyhoeddodd Iechyd Cyhoeddus Cymru adroddiad ar ran Grŵp Cydlynu Adeiladu Cymru Iachach, o’r enw Cysylltiadau Gwell, Canlyniadau Gwell ar gyfer Tlodi Plant . Bydd y weminar hon yn rhannu canfyddiadau ac argymhellion yr adroddiad hwn. Bydd yn cyflwyno offeryn hunanasesu y gall cyfranogwyr ei ddefnyddio i gefnogi cydweithio ar draws pynciau.

Mae modd osgoi tlodi plant a’i ganlyniadau o ran iechyd, ond mae cymryd camau effeithiol i leihau tlodi plant yn gofyn am gydweithio cyson a hirdymor mewn partneriaethau ledled Cymru.  Fodd bynnag, rydym yn gwybod bod cydweithio yn parhau i fod yn her ac roeddem am ddeall beth y gellid ei wneud i gefnogi hyn ar bob lefel.

Yn 2025, cwblhawyd adolygiad llenyddiaeth gennym i nodi nodweddion sefydliadau a systemau sy’n galluogi cydweithio effeithiol. Yna gwnaethom asesu a yw’r nodweddion galluogi hyn o gydweithio effeithiol yn bresennol mewn partneriaethau tlodi plant ar draws pob sector, trwy arolwg a chyfres o gyfweliadau.

Fe wnaethom nodi meysydd helaeth o arferion da mewn nifer o bartneriaethau lleol a rhanbarthol ledled Cymru yr ydym yn bwriadu eu rhannu, yn ogystal â nodi camau galluogi (yn aml ar lefel genedlaethol) a fyddai’n cefnogi arferion cydweithredol lleol a rhanbarthol.

Canlyniadau Dysgu:

• Dysgu am nodweddion cydweithio effeithiol rhwng sectorau
• Cael eich cymell i ddefnyddio’r offeryn hunanasesu i helpu prosesau gwella unigol
• Nodi unigolyn sydd â diddordeb mewn mynd i sesiwn ddilynol i weithio ar gamau ymarferol er mwyn mynd i’r afael â meysydd gwella a nodwyd yn dilyn y weminar.