Mae Sarah Murphy, y Gweinidog Iechyd Meddwl a Llesiant, wedi dweud bod gwasanaeth cefnogaeth gan gymheiriaid i bobl sydd ag anhwylderau bwyta yn gam enfawr ymlaen.

Mae Gwasanaeth Arbenigol ar gyfer Anhwylderau Bwyta Bwrdd Iechyd Prifysgol Aneurin Bevan (SEDS) yn darparu cefnogaeth ar ffurf ymyrraeth gynnar. Mae hyn yn cynnwys cefnogaeth gan gymheiriaid sy’n torri tir newydd wedi’i darparu gan unigolion sydd â phrofiad bywyd o anhwylderau bwyta.

Mae’r rhaglen, sydd wedi’i hehangu drwy gyllid gan Lywodraeth Cymru, yn derbyn atgyfeiriadau gofal sylfaenol ac yn cefnogi pobl ar draws pob lefel risg. Mae’n cynnig cefnogaeth gan gymheiriaid i’r unigolion eu hunain sydd ag anhwylder bwyta ac i’w gofalwyr. Ehangu’r model llwyddiannus hwn ar draws ardaloedd eraill o Gymru yw’r gobaith.

Gwnaeth Sarah Murphy, y Gweinidog Iechyd Meddwl a Llesiant, sydd wedi siarad cyn hyn am ei phrofiad personol ei hunan o anhwylder bwyta, ganmol y rhaglen fel adnodd hanfodol yn y gwasanaethau ymyrraeth gynnar sydd ar gael i bobl yng Nghymru.