Ynglŷn â'r digwyddiad hwn

Mae arolygon cenedlaethol yn dangos bod llesiant meddwl oedolion yng Nghymru wedi dirywio yn ystod y blynyddoedd diwethaf ac rydym yn gweld cyfraddau uchel parhaus o oryder hunangofnodedig.

Dros y blynyddoedd diwethaf rydym wedi gweld cynnydd mawr o ran pobl yn siarad yn fwy agored am heriau iechyd meddwl a salwch. Rydym am adeiladu ar hyn i gael pobl i siarad am yr hyn sy’n eu cefnogi i aros yn iach yn feddyliol.

Er bod pobl yn gwybod ei bod yn bwysig gofalu am ein llesiant, mae arolygon a gynhelir gan Iechyd Cyhoeddus Cymru yn dangos bod lefelau is o ymwybyddiaeth o’r hyn sy’n gweithio i gynnal llesiant meddwl cadarnhaol.

Mae Iechyd Cyhoeddus Cymru a’n partneriaid wedi lansio Hapus, sgwrs genedlaethol ar lesiant meddwl. Nod Hapus yw cael pobl i siarad am yr hyn sy’n helpu i amddiffyn a gwella llesiant meddwl; beth sy’n ein helpu i deimlo’n dda a gweithredu’n dda.

Bydd y weminar hon yn rhoi trosolwg byr o lesiant meddwl a Sgwrs Genedlaethol Hapus.  Bydd yn darparu gwybodaeth am ein Hasesiad o’r Effaith ar Gydraddoldeb, a’r camau yr ydym yn eu cymryd i liniaru effeithiau negyddol.  Byddwn yn siarad am rôl Cefnogwyr Hapus, yn gwahodd sefydliadau i ymgeisio ac yn amlinellu manteision dod yn Gefnogwr Hapus.

Canlyniadau Dysgu:

• Datblygu dealltwriaeth o les meddyliol a’r pethau y gall pobl eu gwneud i’w ddiogelu a’i hyrwyddo.
• Byddwch yn ymwybodol o nodau, amcanion a dull ymgyrch Hapus.
• Deall rôl ‘Cefnogwr Hapus’ a sut i wneud cais.