Ynglŷn â'r digwyddiad hwn

Yng Nghymru, mae gordewdra a heriau iechyd meddwl yn cynyddu’n sydyn, ac mae ein poblogaeth eisoes yn hŷn nag mewn rhannau eraill o’r DU (21.6% dros 65 oed, o’i gymharu â 18.6% ar gyfartaledd y DU).

Mae’r Adroddiad Cenedlaethau’r Dyfodol wedi’i ddylunio i gefnogi gwleidyddion ac arweinwyr cyrff cyhoeddus i wneud bywyd yn well i bobl nawr ac yn y dyfodol. Mae’n hanfodol bod gweithwyr gofal iechyd proffesiynol yn ymwybodol o’r canfyddiadau a’r argymhellion sydd ynddo ac yn eu deall, er mwyn i ni adeiladu dyfodol gwell lle gall ein plant a’n hwyrion fyw bywydau hapus ac iach.

Ymunwch â ni ar gyfer y weminar hon lle bydd Marie Brousseau-Navarro (Dirprwy Gomisiynydd Cenedlaethau’r Dyfodol) yn cyflwyno’r canfyddiadau a’r argymhellion o Bennod Iechyd Adroddiad Cenedlaethau’r Dyfodol 2025. Bydd yn trafod enbydrwydd cyflwr presennol iechyd yng Nghymru a rhai o’r atebion ac arfer da y mae angen i ni eu hystyried mewn sefydliadau sector cyhoeddus.