Bydd meysydd chwarae a mannau chwarae i blant ledled Cymru yn cael eu gwella fel bod pobl ifanc yn cael gwell cyfleoedd i chwarae yn eu cymunedau lleol.

Mae Llywodraeth Cymru yn darparu £5m ychwanegol i awdurdodau lleol brynu eitemau i wella ansawdd mannau chwarae, adnewyddu meysydd chwarae a chefnogi’r gwaith o greu mannau chwarae cynhwysol a hygyrch.

Mae chwarae yn effeithio’n gadarnhaol ar blant a theuluoedd ac mae’n hanfodol yn natblygiad plentyn, gan eu helpu i fagu eu hyder, eu gwydnwch a’u hunan-barch.

Wrth ystyried eu cynigion, gofynnir i awdurdodau lleol gasglu barn pobl, gan gynnwys plant a’u teuluoedd, ar y ddarpariaeth chwarae yn eu hardal; ystyried cyfleoedd chwarae sy’n gynhwysol ac yn annog pob plentyn i chwarae a chwrdd â’i gilydd, a gwella mynediad a diogelwch.